Банк ходимларининг тушлик танаффус вақти ўзгарди

Тошкент, Ўзбекистон (UzDaily.uz) -- Ўзбекистон Республикаси Марказий банки Бошқарувининг 2018 йил 27 январдаги 3/1-сонли қарорига асосан Ўзбекистон Республикаси Марказий банкида ходимларнинг тушлик танаффус вақти соат 13:00 дан соат 14:00 гача этиб белгиланди.

Шу муносабат билан, республикамизда аҳоли, корхона ва ташкилотлар, шу жумладан тадбиркорлик субъектларига банк хизматларини кўрсатиш бўйича қулайликлар яратиш мақсадида, банк ва унинг филиалларида тушлик танаффус вақтини соат 13:00 дан соат 14:00 гача этиб белгилаш масаласини кўриб чиқиш тижорат банкларига тавсия этилди.